प्रतिनिधि सभामा सत्तारुढ र प्रतिपक्षी दलका सांसदहरुबीच धकेलाधकेल भएको छ ।
आइतबार बसेको बैठकमा सभामुख देवराज घिमिरेले अर्थमन्त्री वर्षमान पुनलाई चालु आर्थिक वर्षको आर्थिक सर्वेक्षण र सार्वजनिक संस्थानको वार्षिक समीक्षा पेश गर्न समय दिएका थिए ।
Advertisement
समय पाएपछि अर्थमन्त्री पुन रोष्ट्रममा जान खोजे । तर त्यसअगावै प्रमुख प्रतिपक्षी दल नेपाली कांग्रेसका सांसदहरु वेलमा पुगिसकेका थिए ।
अर्थमन्त्री पुन आफ्नो सिटबाट उठेर रोष्ट्रममा जान खोज्दा सुरुमा रौतहट ४ बाट निर्वाचित कांग्रेसका सांसद देवप्रसाद तिमल्सेनाले अर्थमन्त्रीको अगाडि उभिएर रोके । लगत्तै कांग्रेसका अर्का सांसद रामहरि खतिवडा लगायतका अरु सांसद पनि अर्थमन्त्री पुनलाई रोक्न पुगे ।
Advertisement
त्यसपछि सत्तापक्षका सांसदहरु पनि अर्थमन्त्री पुनका लागि बाटो खाली गराउन वेलमा पुगे । माओवादी केन्द्रका मुख्य सचेतक हितराज पाण्डे, रास्वपाका प्रमुख सचेतक सन्तोष परियारले अर्थमन्त्री मुनलाई वेलमा पुर्याउन खोजे । रास्वपाका सांसद परियारले अर्थमन्त्री पुनको हात समातेर अगाडि लैजान खोजे । नेपाल समाजवादी पार्टीका महिन्द्र राय यादव र माओवादी केन्द्रका जनार्दन शर्माले पनि अर्थमन्त्री पुनका लागि बाटो खाली गराउन भूमिका खेले ।
सत्तापक्षका अन्य सांसदहरु पनि वेलमा आएर अर्थमन्त्री पुनका लागि बाटो खुला गराउन खोज्दा कांग्रेसका सांसदहरुसँग धकेलाधकेल भयो । सत्ता पक्षकै सांसद र मर्यादापालकहरुको सहयोगमा मन्त्री पुन रोष्ट्रममा पुगे ।
Advertisement
यसअघि ३ जेठमा बसेको प्रतिनिधि सभाको बैठकमा पनि सत्तापक्ष र प्रतिपक्षी दलका सांसदहरुबीच धकेलाधकेल भएको थियो । त्यसदिन कांग्रेसका सांसद धनराज गुरुङ सत्तापक्षको सिटतिर आएको भन्दै नेकपा एमालेका अध्यक्ष केपी शर्मा ओली लगायत सत्तापक्षका सांसदहरुले विरोध गरेका थिए । त्यस क्रममा सांसदहरुबीच धकेलाधकेल भएको छ ।
प्रमुख प्रतिपक्षी कांग्रेसले सहकारीको रकम अपचलनमा उपप्रधानमन्त्री तथा गृहमन्त्री रवि लामिछाने संलग्न रहेको आरोप लगाउँदै संसदीय छानबिन गर्न माग गर्दै आएको छ ।
संसदीय छानबिन समिति गठन गर्न सत्तापक्ष र प्रतिपक्षमा रहेका दलहरु सहमत छन् । तर, समितिको कार्यादेश टुंगो लागेको छैन । कार्यादेशको टुंगो नलागेका कारण संसदीय समिति गठन हुन सकिरहेको छैन ।
यो विषयले झण्डै तीन महिनादेखि संघीय संसदको दुवै सभाको बैठक प्रभावित हुँदै आएको छ ।
प्रतिक्रिया